CAMPAÑA DE ATENCIÓN TURÍSTICA

Por Pepe de Rocaforte

Proseguindo unha semana máis co tema turístico ofrezo hoxe unha mini-mostra fotográfica. Non pertenzo ó grupo dos que opinan que unha imaxe vale por mil palabras (cada cousa cumpre a súa función), pero de vez en cando non vén mal valerse un pouco máis do aspecto gráfico, máis descansado, tanto para o autor como para o posible visitante desta páxina.

Coa foto número 1 entro no miolo da cuestión: ¡Moito ollo, turistas, este lugar por onde andades non é voso! ¡Coidadiño! De estragar debidamente o entorno ocupámonos nós, os indíxenas, e chega ben.

Vexamos se non a foto número 2, onde nos encontramos cun camiño de acceso ó mar, recente e debidamente asfaltado para que as rodas dos vosos, e os nosos, vehículos vaian coma unha seda e non distraian a nosa atención dunha boa vista da ría máis fermosa do mundo. Ademais, para lle dar un pouco de emoción ó asunto, preocupámonos de sementar aquí e alá, polo medio da calzada, uns postes de tendido eléctrico e/ou telefónico cos cales poñer a proba os vosos reflexos automobilísticos. Compre estar atento, así é como mellor permanecerán as imaxes na memoria.

Na foto número 3 observaredes unha das moitas mostras de agrupacións pétreas espalladas a flor de auga por toda a extensión da ría de Arousa, algunhas, como a da imaxe, xa uns illotes de certa consideración. ¿Non si que fan bonito?

Pois para que gocedes máis con estas illadas pedras mariñas admirade, na foto número 4, a nosa feliz ocorrencia de unir varios illotes entre si por medio de fermosas pontes que conforman un paseo marítimo atractivo onde os haxa. E se o paseo vos parece moi longo podédelo percorrer en patinete eléctrico, por exemplo, que lle dará un aire máis hierático e veloz á vosa figura circulante.

Na foto número 5 achegamos un pouco máis a visión dese marítimo paseo para que poidades admirar mellor as airosas pontes inter illotes. Mágoa de non dispormos de fondos suficientes para lle ter encargado a súa construción ó señor Santiago Calatrava.

Para cerrar a reportaxe gráfica aí temos a foto número 6. ¿A que adiviñades o que o escultor Gonzalo Sarasquete representou na súa atractiva escultura? A min, que estiven en Xenebra hai pouco, desde lonxe, e nun primeiro golpe de vista, lembroume as catro figuras centrais do Muro dos Reformadores. A outro acompañante, recén chegado da Capadocia, fixéronlle pensar no “Val do Amor” de Göreme. E non digo que máis cousas pensaron outros compañeiros de camiñada para non evidenciar a nosa burremia mal intencionada.

Porque si, ¡son percebes! E se as vosas posibilidades económicas volo permiten, por aquí sempre poderedes atopar un bo sitio onde degustalos. Tan grandes coma os da escultura poida que non, pero dependendo do gasto aínda podedes apañar algúns de bastante boas proporcións (segundo me contan).