TRISTEZA E FESTA DO LIBRO

Por Pepe de Rocaforte

  Unha amiga miña, por razóns que non veñen agora ó caso, deixa Madrid, onde vivía desde hai trinta anos, e regresa a Galicia. Entre as varias incidencias orixinadas por este traslado ocupa un lugar importante o ter que se desfacer de grande parte do mobiliario e outros enseres caseiros ó cambiar a casa onde vivía, de catrocentos metros cadrados habitables, por un piso de noventa metros, máis axeitado ás súas necesidades actuais.

  De todas cantas cousas se desfixo o que máis dor lle causou, dime, foi o destino dado a unha boa cantidade de libros. Andounos ofrecendo a bibliotecas, a centros escolares, a varias asociacións, e en ningún lugar mostraron interese por semellante material. Nin sequera por unha voluminosa Enciclopedia Larousse, que finalmente rematou, coma o resto dos libros de que se desfixo, nunha máquina destrutora de papel.

  Porque ese foi o único modo de que llos levasen. Mellor dito, de que os levasen entre ela e unha amiga, cada unha no seu coche, a un almacén onde compraban papel, nunha localidade do extrarradio madrileño. Aínda que o de comprar sexa case unha figura retórica, porque á pregunta de canto lle pagarían, a contestación foi que dependía da calidade do papel. Finalmente a cousa rematou nun pago de dezeoito euros "para gastos de  gasolina".

  E o detalle da enciclopedia faime lembrar de Miguel de Unamuno quen, en "Por tierras de Portugal y de España", fai unha desapiadada descrición do Casino de Trujillo, en cuxa biblioteca, "pobrísima", non faltaba, eso si, "o inevitable Dicionario Enciclopédico que serve para dirimir as cuestións con apostas". ¿Para que fai falta agora un dicionario deses se a información se ten nun iPad ou nun iPhone xa ó alcance dos nenos de dez ou doce anos?

  ¿E a que conto vén agora todo esto? Pois relátoo porque esa tal aventura da biblioteca da miña amiga causoume moita tristeza, máis que nada polos malos augurios respecto ó previsible futuro do libro, e penso que non só do libro impreso, senón da lectura en xeral.

  Para contrarrestar esa tristeza quérome alegrar hoxe coa apertura da Feira do Libro da Coruña, a máis importante e concorrida de Galicia. Ainda que posiblemente sen nos coñecer, espero vernos todos por alí en calquera destes dez días que dura o evento.