As troitas de san Francisco

Ó santo de Asís témolo visto con lobos, cans e paxariños en moitas das iconas que o representan, pero cun cesto de troitas só en dúas ocasións, e as dúas en Galicia: unha no retablo do altar maior da igrexa de san Martiño Pinario, en Compostela, e a outra esta pequena imaxe de xoiería que se conserva no Museo da deputación provincial de Lugo.

A razón de tal imaxe está nunha transacción urbanística que se operou na cidade do apóstolo cando os franciscanos, facendo votos de pobreza, decidiron instalarse preto do sepulcro de Santiago.

Conseguir os cartos para facer a súa casa non era doado, ninguén se fiaba daqueles mendicantes que cubrían o seu corpo cun basto hábito de mala tea, pero, con boas mañas e inspiradas negociacións accederon a solicitar unha especie de hipoteca a longo prazo dos monxes de san Martiño de maneira que estes lle cedían un solar para o seu convento, con horta incluída, a cambio de que cada ano, polo once de novembro, día do seu patrón, os franciscanos lle levasen unha ofrenda consistente nun cesto de troitas.