mércores, 2 de outubro de 2013

San Cápito, o primeiro bispo de Lugo


       
     Non sei se haberá alguén que se lembre de san Cápito. Tampouco sei se haberá alguén que saiba cando foi o seu martirio, ou se algunha vez foi nomeado en algún acto relixioso. San Cápito, ou Capitón (que nisto nin se poñen de acordo os posibles haxiógrafos), perdeu a partida dentro do santoral e, a pesar do título de santo ninguén fala del.
            Andei preguntando aquí e aló, googleando e pedindo información ás instancias eclesiásticas, e sigo sen saber case nada da personaxe. Por iso me animei a sacar este artiguiño, invitando ós lectores que saiban algo máis del a axudarnos a coñecelo.
            Sabemos que foi o primeiro bispo de Lugo, aló polo século primeiro, que foi discípulo do apóstolo Santiago, que morreu queimado en Pontegaos, na parroquia de san Lázaro da Ponte e que as súas cinzas foron botadas nun lugar chamado Santas Masas, e nada máis.

            Non sei ata onde é certa toda esta información, pero non estaría de máis que, esta personaxe que capitanea a fachada da catedral de Lugo fose un pouco máis coñecido.

1 comentario:

  1. No libro "Santoral Completo", que vén sendo unha relación de santos co día da súa celebración, da autoría do Dr. Angel Fábregas Grau, Presbítero, editado por "Librería la Hormiga de Oro, Barcelona, 1990, cuarta edición, hai dous san Capitón, un mártir e outro bispo e mártir, que supoño será o de Lugo, indica que a súa celebración é o catro de marzo. Non di máis o autor, co que seguimos sen saber moito.

    ResponderEliminar