Diana a cazadora

       

                 O mes de novembro tíñano os romanos posto baixo a advocación de Diana, irmá de Apolo, a deusa cazadora que toma os seus atributos da Artemisa grega, como deusa protectora dos montes, dos cans e da natureza non cultivada, tal vez porque aínda hai só quince días que foi a “berrea” marcando unha novo e fecundo ciclo anual, a pesares de que o inverno semella matalo todo.

            No templo de diana non podían entrar cabalos, por considerar que foron estes os que mataron ó seu namorado Hipólito, cando paseaba pola beira do mar e os animais se asustaron cunha ondas repentinas, facendo que o xinete caese e morrese. Pero si ten por animal da súa preferencia ó cervo, o animal cuxa cornamenta se pode confundir coas ramas das árbores e a quen lle nace unha nova ramificación cada ano, co que o cervo vén a converterse nun símbolo da vida que imos celebrar precisamente nestas datas en que nos lembramos dos nosos finados.