venres, 13 de marzo de 2015

Brocos, o mestre de Picasso



Por  Adrog Ahcorb
Con  motivo da exposición que trata de celebrar o 120 aniversario da primeira exposición que Picasso fixo na Coruña, e que tamén foi a primeira exposición da súa vida,  “A fundación” da antiga Caixa Galicia ou da nova Abanca, tirou dos seus fondos para amosarnos a interesante exposición”Picasso e seu mestre Isidro Brocos”, un dos seus mestres na Escola provincial de Belas Artes da Coruña, onde o neno Pablo recibe as primeiras clases de ensino artístico regrado, nesa época fundamentaal para a formación e que vai entre os nove e os trece anos. Un mestre de quen, moitos anos máis tarde, xa mediado o século XX lle falaría a Camilo J. Cela.

Pero traemos hoxe a Isidro Brocos, un escultor que non só foi quen de aportarlle unha aura de sensualidade ás imaxes relixiosas, senón que tamén lle aporta ás súas esculturas de temática popular a forza dun realismo non exento de certa gracia humorística, pequenas escenas que contan toda unha historia. Aquí reproducimos dúas das esculturas que se poden ver na exposición de Abanca, “O xastre”, quen observa en detalle como lle queda o traxe ó cativo, porque ese traxe vai ser tamén o traballo dun artista que os paisanos van valorar, non só se ó rapaz lle queda ben a roupa ou non, senón que o acabado sexa perfecto, pois cada prenda que el fai é como unha voz falando da súa profesionalidade, e como tal artista, para acentuar máis esa función do personaxe, debaixo do asento ten a gaita, porque o xastre tamén é músico. E no de “Ai, aí, a pulga”, os personaxes non se ven remendados, despeiteados ou desaseados, pero o mal que aquí se representa era unha constante coa que non bastaba a loita persoal senón que tamén necesita da colaboración, neste caso, entendemos que da neta. Dúas persoas necesarias para darlle caza a un diminuto e malvado insecto que escarabella entre as roupas e as intimidades da persoa co único afán de enfastiar.

Ningún comentario:

Publicar un comentario