xoves, 1 de xaneiro de 2015

Xaneiro xiadeiro

                
     
       Xaneiro, empeza con día soleado pero frío, cousa que non é de estrañar, porque xa o refrán o di. Xaneiro xiadeiro, e as mañas amencen cunha capa branca da que a voz popular di que a “Vella” peneirou toda a noite.
            E volvemos ó mito da vella, ¿quen é a Vella?. A Vella do arco de cores, tamén é unha “Vella”, pero unha vella a quen non lle coñecemos a cara. Como queira que sexa, hoxe empezamos un novo ano con vellas preguntas e con novas observacións. Xa sabedes que de como sexa cada un destes primeiros días do ano, no que ó tempo se refire, así será o mes correspondente segundo o ordinal, ou iso din, que nisto das adiviñas e das sortes propiciatorias hai moitas e moi variadas, que cando acertan porque acertan e cando non porque non estaba de Deus.
            En fin, que aquí seguimos celebrando as festas e os festexos, mirando ó ceo e a terra, pero sempre escoitando a voz de quen nos pode contar novas cousas ou de quen nos abre os ollos para ver con entendemento todo o que nos rodea.

                        Feliz ano

Ningún comentario:

Publicar un comentario