martes, 29 de decembro de 2015

Un parladoiro en Toques




Deixade que vos amose este rinconciño de Toques, nas terras de Melide, esta casa, comesta pola herba e xa en proceso de derrube.
A entrada á casa de onde aínda non se recolleron as cadeiras do último parladoiro, no lugar máis adecuado cando a temperatura ambiente o permite, na porta, protexidos por un tellado e cara á rúa por onde todo pasa e quen quere detense a falar, a formar parte do parladoiro.
Logo temos a propia arquitectura, unha casa de planta baixa, aínda que o acceso á vivenda se fai por uns chanzos protectores para que os animais domésticos non teñan a tentación de entrar, e de facelo, como moito só o gato, que cumpriu unha función profiláctica a través dos séculos; e a un lado (ós dous lados, realmente) desta especie de pórtico ou vestíbulo, as cortes.
A casa é vella, seguramente xa non ten moradores, pero serve para que os habitantes do século da tecnoloxía dixital nos fagamos unha idea da vida de hai corenta anos atrás, cando se tuiteaba cara a cara, cando os animais formaban parte da casa, e ata da familia, en que a veciñanza recibía as noticias de xeito asembleario, e de xeito asembleario se facebuqueaba (ou como se diga) e  xulgaban as conductas de cada veciño, en parladoiros polo estilo.

Ningún comentario:

Publicar un comentario