sábado, 25 de abril de 2015

Consellos a unha embarazada (V)



O nacemento anunciado.
            Antes de que existisen as ecografías, había varios sistemas para saber se o futuro recén sería home ou muller, así, prognostícase que o segundo fillo será varón se o primeiro aperta unha boneca; pero tamén segundo a lúa de cando naceu o anterior fillo, tal e como sentencia o refrán “nacido en crecente outro diferente, nacido en minguante outro igualante”, o seguinte, se entende. Ou observando a forma da barriga, pois se esta é alta e puntiaguda, será home e se é redonda e un pouco baixa será muller. E tamén, se a embarazada ten por costume saír da casa co pé dereito será varón e se co esquerdo muller.
            Así mesmo, ha de estar atenta a futura nai á calidade de persoa do que leva no seu ventre por se dá signos de intelixencia prenatal.
            Xa sabemos que a grande marabilla que se opera nos pais é sentir as patadiñas do feto, un anuncio de vida digno de gorentar. Mais aínda hai un signo que vai máis aló da vida deportiva do non nato, e é cando se anuncia que o ser que medra no ventre será un sabio, e este caso só se dá cada sete xeracións por vía de primoxenitura masculina. Así pois, se ante algún tipo de preocupación a nai sente unha voz saída do seu interior que a advirte, ou lle comenta algo, xeralmente referente ás cousas da casa, tal que se lle queima a comida, Que alguén que tarda en chegar xa está en camiño, ou que lle dá consello ou advertencia sobre algo que vai suceder moi axiña, pode estar segura que foi o seu futuro fillo quen falou. Pero, de darse o caso, non debe comentalo con ninguén ata que o crío naza, pois senón ela abortará. E cando naza, para saber se realmente o neno é sabio ou non, só ha de mirarlle o ceo do padal, onde estará representada a roda partida de santa Catalina, dúas medias circunferencias que son o indicativo da súa sabedoría.
            Claro que ante estes casos sempre hai quen opón razóns fisiolóxicas, tal que é unha carencia de soldadura dos ósos do padal, que xa irán soldando en poucas semanas. Pero iso é cousa que só cren os incrédulos dos médicos e quen lles fai caso.
            Para prever que o mal aconteza, un dos remedios é deitar unha galiña.

Ningún comentario:

Publicar un comentario