Se abril é o mes en que as flores
anuncian a vindeira chegada do froito, santa Casilda opera a función contraria,
convertendo o froito, e por facelo máis difícil aínda, o pan, que é o froito
cociñado, en flores.
Todo ocorreu cando esta filla do
emir de Toledo ía visitar ós cristiáns que seu pai tiña na cadea e lles levaba
pan envolto no mandil, e cando seu pai, sospeitando que por detrás del a rapaza
rompía todas as normas da súa lei, lle preguntou que levaba, ela díxolle que
flores, e cando o emir quixo que llas amosase, ela desenvolveu o mandil e o pan
que agochaba converteuse en flores que reluciron no seu regazo.
Tamén se conta que tendo ela un mal
que os médicos non eran quen de curar, visitou a fonte de san Vicente, que tiña
fama entre os cristiáns por obrar milagrosas curacións, e tras introducirse
nela, tamén ela curou do seu mal, polo que se converteu ó cristianismo e se
fixo eremita; e hoxe invócase contra a esterilidade conxugal e para conter as
hemorraxias.
Ningún comentario:
Publicar un comentario